Qo‘lingizdagi ushbu yangi tarjima kitobning avvalgi nashrlaridan quyidagi xususiyatlari bilan ajralib turadi.

1. Biz tarjimaning keng kitobxonlar ommasiga tushunarli bo‘lishi, oson va yengil o‘qilishi uchun zamonaviy o‘zbek adabiy tili talablariga rioya qilishga katta e’tibor qaratdik. Bu kitob nafaqat diniy ta’lim muassasalari o‘quvchi-talabalari, balki ilm yo‘lini tanlagan turli yo‘nalishdagi talabalar uchun ham foydali bo‘lishini hisobga olib, arabiy so‘zlar va istilohlarni o‘zbek tilidagi muqobilida, tushunarli shaklda qo‘llashni ma’qul ko‘rdik.

2. Burhoniddin Zarnujiy o‘z kitobining bir necha o‘rinlarida bu qo‘llanmaning qisqa va ixcham bo‘lishini istaganini qayd etadi. Masalan, muallif aytadiki: “Ilmning fazilatlari haqida ko‘plab oyatlar va mashhur sahih xabarlar kelgan bo‘lib, biz kitobning cho‘zilib ketmasligi uchun ularni zikr qilib o‘tirmadik”, deydi.

Muallif yashagan XII-XIII asrlarda davrda odamlar katta hajmdagi jild-jild kitoblarni o‘qishga qiynalib, faqihlardan muxtasar kitoblar yozishni iltimos qilar edi. Zarnujiyning ustozi Burhoniddin Marg‘inoniy ham o‘z kitoblarida bu haqda alohida qayd etganlar.

Ta’kidlash kerakki, kitob kichik va foydalanish uchun qulay bo‘lgani sababli ham o‘z davridan to bugunga qadar sevib o‘qilgan, odamlar orasida keng ommalashgan. Biz tarjimada muallif uslubini saqlab qoldiq, uzundan-uzoq sharhlar va qo‘shimcha izohlardan tiyildik. Bugungi o‘quvchi uchun tushunarsiz bo‘ladigan o‘rinlarnigina biroz sharhladik.

Qaysi jumla Zarnujiyniki, qaysi biri esa yangi qo‘shilgan sharh ekanini aniq farqlash uchun sharh va izohlar kursiv shaklida keltirildi. Masalan, “Tavakkul deganda Alloh taologa dunyo va oxirat ishlarida foydani jalb qilish va zararni daf etish bo‘yicha sidqi dildan suyanish tushuniladi”.

3. Faqih va shoir Burhoniddin Zarnujiy o‘z kitobida mavzularni faqih va shoirlarga xos uslubda bayon qilgan. Ko‘plab o‘rinlarda she’r va hikmatlardan foydalangan. Yangi tarjimada biz muallifning o‘z uslubini kitobxonlarga asl holida yetakzish maqsadida she’rlarni aynan she’riy uslubda tarjima qildik. Toki o‘quvchi bundan o‘ziga xos zavq va foyda olsin.

4. Axborot almashinuvi tez kechayotgan, ma’lumotlar oqimi har qachongidan ko‘paygan bugungi kunda o‘quvchi ixcham va xulosaviy ma’lumotlarni afzal ko‘rashini e’tiborga olib, har bir fasl yakunida “Fasldan olinadigan foydalar” qism kiritdik. Unda mavzu bo‘yicha muallifning aniq va xulosaviy fikrlarini jamladik. Mazkur uslub kitobni yaxshi tushunish va undan ko‘proq foyda olishga xizmat qiladi, degan niyatdamiz.

Biz bu yerda kitobning tarjimon va muharrirlari keltirgan farqlarni sizga ilindik.